قصيدة للشاعر/ نايف العبيد بعنوان (( هيا تعال )) بمناسبة حصول نادي النصر على دوري جميل ٢٠١٥م :

تهتف جماهير النصر ألف مبروك =يالعالمي ، حققت ، أغلا بطوله
جمهورك المخلص من القلب هنوك=وقف معك في كل جوله ، وجوله
معذور جمهورك إذا هم ، حبوك=اللــي يحبــك ، مايغيّــر ميولــه
ومالومهم بالشمس لو كان سموك=شف الفُرَق ، لاجيتها غاب زوله
يوم الخصوم اللي تحدوك نادوك=” هيا تعال ” اخرست ناسٍ تقوله
انته كذا ، تلطم وجه ، من تحدوك=وتعلّم الجهّال ، لعـب ، الرجولـه
كل الفرق ، من لعبتك أمس هابوك=تطيب من كوي الرحول ، الزموله
واللي يطق الباب لوكان مصكـوك=يلقـى جواب الرد ، حـزة وصولـه
من قابلك مرماه ، يانصر مدكوك=ذكرتني بطلعـات ” حزم البطولـه ”
اهدافك بمرمى المنافس ” تماهوك “=حاول بها الحارس ولاهوب حوله ؟!
متصـدر الدوري ، أبـد ماتعــدوك=والمركـــز الأول ، مقـــر ، الزحولـــه
كنك ملكت الدوري ، يانصر بصكوك=الحمــد للـه ، كل عــامٍ ، تـنـولــه
هذي السنة والعام تاطى على الشوك=فارس نجد ، بالمجد تصهل ، خيوله
مبروك ، قلته يانصـر، ألف مبروك=الدوري ، اللي صعب غيرك ، يطوله