سلام ياللي تسنع القاف تسنيع
والقاف عندك راضخاتً رسومه
يابو عبيد الوقت مابه مطاميع
الا الوناسه وكم ركعه تقومه
هب البراد وزان جو المطاليع
واقفى لهيب القيض واقفت سمومه
نبي نولم مبعدات المراميع
شهب الجيوب اللي عليها قرومه
امكملاتً بالعزب و المنافيع
مع كبش مصلاحً ترادم شحومه
نبعد عن اللجه وكثر المشاريع
مع النفود ومّرقبن راس حومه
بخوة رجالً بالقرامه صعاصيع
الكل منهم جاهزً في لزومه
ليا جلسو كنه حراراً مفاريع
مثل الحياء كلً تبين علومه
يعل يفداهم بخيص المواجيع
اللي يدسس بالعسل من سمومه
للجار ذُل مضيع السلم تضييع
ولضيف ماتلقى بداره عزومه
يفرح على الصاحب بعثره وتلكيع
ياعل تقّطعّه الليالي الغرومه
يالله ماغيرك لنا من مفازيع
مزنً من المنشى تراكم غيومه
ديمً ينقع يابس القاع تنقيع
الين وديانه تقطع ردومه
والأرض تنور والزبيدي مصاليع
والناس فرحت بالربيع وقدومه
وصلو على من حاز عنده مشافيع
في يوم كلً خالياً من هدومه
عقيل الدليقم
